كيف تشتري كل اللي تبغاه و ما تضيع فلوسك؟
كيف تشتري كل اللي تبغاه و ما تضيع فلوسك؟
قبل ابدأ لازم تفهم اول:
١- هذه الطريقة اتعلمتها من تجربتي و بعض نصائح اللي حولي و كم كتاب و غربة الابتعاث.
٢- اللي نفع معاي مو شرط ينفع معاك. الطريقة ناجحة جدا بغض النظر عن دخلك، و اكتشفت الكثير من الناجحين يتبعها او شبيه بها.
٣- انا نشأت في عائلة متوسطة الى فقيرة و كنت محروم من اشياء كثير هي مسلّمات عند البعض، من عمري ٨ سنين الى ان اتوظفت. الحمد لله.
لا تعتقد اني غني و جاي انظّر عليك.
٤- ما اتعلمنا في اي مرحلة تعليمية كيف ندير أموالنا و نتصرف فيها، طبيعي جدا انك الآن مديون او تعاني ماديا.
٥- ما راح أقول لك لا تضيع فلوسك في قهوة او مطعم او لعبة فيديو او فلم او مطعم، و لا راح أقول لك لازم تستثمر في بورصة او عقار او صفقة.
٦- هدفي أشارك هذه الطريقة الناجحة و ما تعيش على وضعية الأزمات و من الراتب للراتب.
٧- كل شيء أقوله بمثال او تشبيه، لا تتمسك بالمثال و التشبيه و تنسى الفكرة الأساس.
كم مرة سار لك هذا الموقف؟
تشوف الصور الحلوة لواحد راجع من سفرية على مواقع التواصل و تقول في نفسك لازم اسافر هذه السنة.
تسمع فلان اشترى سيارة جديدة و تبدأ تفكر سيارتي فيها و يخطيها.
تشوف صور مطاعم و أكلات و قهوة شهية و تقول نفسي اجربها.
و اخر الشهر تكتشف انك ما سويت ولا شيء و متورط في مبلغ او ما سددت فاتورة او ايجار و لا تدري فين طارت الفلوس.
و الان مع الخطة في ست ملاحظات:
.١- اعرف مصاريفك كلها و رتب أولوياتك
و قسّم دخلك بناء عليها. حط لك ميزانية لكل شيء عندك و لا تتعداها.
عندك الضروريات: سكن، اكل، مواصلات، تواصل. هذه ما تقدر تعيش من غيرها و لا تقدر تساوم عليها.
ايجار او قسط البيت، فواتير جوال و كهرباء و مويه و إنترنت، مقاضي و اكل، قسط سيارة الخ.
عندك المهم: اشياء مهمة بالنسبة لك لكن ما لها وقت عاجل
مثل ملابس، صيانة دورية، كتب دراسة، دورة علمية، رحلات او نزهات، التزامات اجتماعية و هكذا
عندك اقل أهمية و بعيدة لكن تبغى تسويها: سيارة جديدة، مشروع صغير، صيانة او تجديد بالبيت متوسط او كبير، سفرة حلوة، جوال او كمبيوتر جديد و هكذا
فيه برامج كثير على الجوال تساعدك على تحديد مصروفاتك الشهرية. اذا كتبت كل ريال فين بيروح، راح تعرف فين الهدر عندك اذا كان موجود.
مثل هذا:
MoneyTron+ by MoneySmart Inc.
او استخدم ورقة و قلم و حط لك جدول إكسل.
مهم تعرف الفرق بين:
اذا تبغى هذا الشيء؟
او تقدر تجيب هذا الشيء؟
او تحتاج هذا الشيء؟
هذه الأسئلة في ظاهرها متشابهة لكن الإجابة عليها مختلفة تماما و تغير نظرتك لمصاريفك و احتياجك الحقيقي.
٢- اعطي كل ريال طريق ينصرف فيه حسب الأولويات اللي حددتها في الخطوة الاولى من اول يوم ينزل فيه الراتب.
لا تترك فلوسك في الحساب الجاري لانها راح تطير من دون ما تحس.
استخدم مظاريف او خزنة او ملفات او حساب بنكي بدون بطاقة، اهم شيء لا تترك فلوسك في حسابك الجاري.
مثلا: قسط البيت الف ريال في الشهر تسحب الف كاش كل شهر و تحطها في ظرف في البيت و تكتب عليه ايجار البيت. لا تتركها في الحساب الجاري. تجي اخر السنة تلاقي عندك ايجار البيت كامل بدون قلق.
مثال ثاني: ظرف فيه الف ريال للمطاعم، صرفتها في مرة واحدة او اربع مرات، لا تزيد عن الالف اللي حددتها حتى لو بقي على راتب الشهر الجاي يوم واحد.
لو اكتشفت انه فيه شيء فعلا انت تبغاه، وهو مو من الضروريات، حط له ميزانية شهرية و ظرف، و كل شهر حط المبلغ المطلوب و اذا اكتمل، اشتريه و استمتع. بس لا تدخل نفسك في دين عشانه.
انت تحدد الأشياء المهمة بالنسبة لك. في النهاية هي فلوسك و حياتك.
لو كان كوب القهوة المختصة الغالية هو اللي يعدل مزاجك و يخلي يومك ممتاز و تنتج، حط له ميزانية و اشتريه. هذا الكوب في نظر البعض سخافة او بذخ لكنه مهم بالنسبة لك.
نفس الكلام ينطبق على لعبة فيديو او فلم او سفرية او سيارة او ترميمات او جوال او اي شيء ثاني.
حاول قدر المستطاع انك تتخلص من ديونك الحالية و اعتبرها من الضروريات. سواء كان الدين لقريب او صديق او بطاقة ائتمانية.
كل شهر ادفع جزء و أتخلص منه. لا تراكم على نفسك الديون. مع الوقت راح تصيبك الديون بالشلل و الاكتئاب. لو عليك ديون كثيرة بعضها صغير و كبير. سدد الصغيرة اول و أتخلص منها، ترتاح اكثر و تقدر تسدد بتركيز اكثر على الكبيرة. هذه الطريقة افضل من انك تسدد الجميع بشكل ضعيف و لا تخلص. و افضل من تسديد الكبير و ناس كثير تطلبك.
٣- تأقلم مع الضغوط و غيّر خطتك اللي لازم تكون منطقية.
عندك عدة مظاريف فيها فلوس في البيت و كل واحد له أولوية. حدث لك حدث طاريء خارج عن الحسبان مثل مرض او عطل او حدث عائلي او اجتماعي مهم جدا، اسحب من المظروف الأقل أهمية و استخدم منه و الشهر الجاي عوض النقص.
لو كان الخلل في شيء من الضروريات، عيد حساباتك، ممكن يكون تقديرك للاحتياج اقل من الحقيقة. عدّل و كمّل.
مثال: لو حطيت مثلا ميزانية الاكل الف ريال شهريا و صار كل شهر مصروفك الف و ثلاثمائة و صرت تسحبها من مظروف ثاني. حسابك غلط، عدّل و كمّل.
راجع ميزانيتك و أولوياتك باستمرار.
ممكن تحط ظرف خاص بالطواريء و ما تدخّل نفسك في متاهات.
٤- اصرف من فلوس الشهر الماضي مو فلوس الشهر الحالي و كل ما صرفت من فلوس شهور ماضية اقدم، كان افضل.
(يعني عتّق الفلوس عندك)
لو تقدر تطبق هذا الكلام حتى على الضروريات، راح تحس براحة نفسية كبيرة. تخيل انك تدفع فاتورة الشهر الحالي بالفلوس المخصصة للفواتير اللي انت حطيتها على جنب قبل ٣-٤ اشهر. كيف إحساسك راح يكون و انت عارف انك تقدر تدفع فواتير ٣-٤ شهور قدام من الآن؟
٥- حاول تبعد عن بلّاعات الفلوس.
حاول ما تشتري سيارة غالية لا جديدة و لا مستعملة. السيارة تنقص قيمتها مع الوقت و تكلفتها التشغيلية عالية و راح تقتطع من ميزانية دخلك كثير و تخرّب عليك ميزانية اشياء ثانية و تقلل مرونتك المادية.
الطبقة المستهدفة بالسيارات الغالية ما تفرق معاها الفلوس و ممكن يبدلها صاحبها بسهولة او حتى يستغني عنها. لا تشتريها الا اذا كنت تقدر عليها.
مثال: سيارة كفراتها تكلفك ٨-١٢ الف ريال غير سيارة تكلفك كفراتها ألفين ريال.
اشتري سيارة أرخص و جديدة تعيش معاك افضل من غالية او غالية و مستعملة. في النهاية ما راح يعاني غيرك و لا احد راح ينتبه لسيارتك كثير.
حاول ما تأخذ قرض استهلاكي سواء كان للسفر او سيارة او ترميم البيت الخ. المتعة راح تختفي مع الوقت و يبقى الدين عليك.
حتى الذكريات الحلوة يروح طعمها بسبب الظروف المادية الصعبة اللي دخّلت نفسك فيها عشان هذه المتعة.
حاول ما يكون عندك حيوان أليف لنفس السبب. المزروعات الداخلية و الخارجية افضل لك.
التزم بصيانة كل ما يحتاج صيانة دورية عشان لا يخرب عليك و تضطر تدفع أضعاف مضاعفة.
ابتعد عن مشتريات محلات الخردة ابو ريال و ريالين. جودة منتجاتها ضعيفة و تخرب و تضطر تشتري غيرها مرة ثانية.
اشتري الجودة مو الكمية. قميص بثلاثمائة ريال بجودة عالية او مقبولة افضل من ٣ قمصان كل واحد بمائة و جودة رديئة.
راجع اشتراكاتك الشهرية بانتظام و ألغي اللي ما تحتاجه منها او خفضها. باقة جوال مثلا او اشتراك قنوات او برامج او ألعاب.
٦- لا تنسى يكون للمحتاجين نصيب من دخلك، كفالة، اعانة، هدايا، دين
"وَالَّذِينَ فِي أَمْوَالِهِمْ حَقٌّ مَّعْلُومٌ، لِّلسَّائِلِ وَالْمَحْرُومِ"
انت تحتاجهم لآخرتك اكثر من حاجتهم للدنيا من عندك.
Comments
Post a Comment