آداب الفضفضة و الإستماع
لو شخص جلس يفضفض لك عن مشكلة، خلي بالك من:
١- اعرف انه اختارك من بين الناس، لسبب ما
احترم هذا القرار و لا تخليه يندم
٢- احذر من مقاطعة كلامه،
الا اذا كانت مقاطعة استفسار او تأكيد معلومة او فكرة.
٣- قاوم نزعة "مفتي الديار" و "حلّال المشاكل" و "مقّطع السمكة و ذيلها"
٤- اسأل صاحب المشكلة عن الحلول المقترحة اللي تخطر على باله
ممكن يحتاج احد يسمع له بس
و مو مطلوب منك حاجة
٥- اسأل صاحب المشكلة "كيف اقدر أساعدك؟"
كدا يحس انه لسه مسيطر، و كدا تقدر تعرف حجم المطلوب منك من غير زيادة و لا نقص
و تقدر تعرف اذا أصلا تقدر تساعد و لا خارج عن قدرتك
"كيف اقدر أساعدك؟" تخليك تعطي ضمن التوقعات و لا تخرب المشكلة او تزيدها،
و لو قدمت زيادة تكون محل تقدير من صاحب المشكلة.
٦- ركَّز على المهم و اترك فلان و علان
٧- ركَّز في المشكلة و لا تقول انا سار لي كذا زمان و سويت كذا و ضبطت، اللي يصلح معاك مو شرط يصلح مع غيرك
٨- حاول تحط نفسك مكان صاحب المشكلة عشان تقدر تحس فيها،
اللي يده في النار مو زي اللي يده في المويه
٩- لا تعتبر اللي انت تعرفه مسلّمات، يمكن ببساطة ما يعرفها او ما تنطبق عليه
١٠- مو لازم تنحل المشكلة بخطوة واحدة، ممكن تحتاج خطوات كثيرة
١١- قسّم المشكلة الى اجزاء صغيرة ممكن تحلها
١٢- مو لازم تعطيه الجواب (لو كان عندك) مباشرة،
ممكن تلمّح او تعطيه الجواب بطريقة غير مباشرة،
كدا تعطيه احساس انه هو اللي قدر يحل المشكلة مع انه انت اللي أعطيته الحل،
هذا الإحساس جميل عند صاحب المشكلة و لا يكابر لانه من عنده
و لو ما ضبط، مو انت الملام
١٣- أتأكد انك فاهم المشكلة و تبعاتها و تبعات حل المشكلة، مو كل شيء يجي بالفزعة
١٤- لا يسير حلّك اسوء من المشكلة
١٥- لا تخليه يندم انه شاركك
١٦- لا تقول لأحد على المشكلة الا بعد استأذان صاحبها،
ممكن الشخص الثالث اللي تقول له او تستشيره يكون ضلع فيها و انت ما تدري
١٧- ممكن تقول اسف انا ما اقدر أساعدك، المشكلة كبيرة او ما تعرف حلّها.
هذا بحد ذاته خدمة لصاحب المشكلة.
اعتذارك ما ينقص منك.
١٨- جوابك لازم يغطي المشكلة من جميع جوانبها، ديني اجتماعي علمي عملي...الخ
١٩- مو لازم يكون عندك جواب، عادي
٢٠- اذا ما تعرف، لا تفتي قول ما اعرف
ارجو لكم حياة مليئة بالتفاهم
Comments
Post a Comment