تحقيق الأهداف
كيف تحقق أهدافك؟
عندك أهداف كثيرة في حياتك نفسك تسويها، وقتك ضيق، دائما مشغول، التزامات اجتماعية، طفش، العين بصيرة و اليد قصيرة. تشوف ناس تحقق اشياء كثير و لا تعرف انت ايش المفروض تسوي. عندك شيء لازم تنجزه و تتفاجأ بالوقت طار و سار لازم تخلصه و تقدمه بكره.
كلنا مرينا بهذه التجربة و عندنا هذا الإحساس.
كيف تقدر تحقق أهدافك و تشحذ همتك كل يوم؟
قسّم مهماتك و أهدافك الى يومية و أسبوعية و شهرية و سنوية.
حدد كل مهمة و حط لها جدول زمني تنفذها خلاله.
حدد أولوياتك لأن وقتك محدود. ابدأ بالاهم ثم المهم.
الوقت لا يعني الفلوس و لا يساوي الفلوس. الفلوس تجي و تروح لكن الوقت اذا راح ما يرجع.
ما راح تقدر تسوي كل شيء اذا ما سويت اي شيء. عشان كذا لازم تقسم المهمة الواحدة الى خطوات اصغر تحققها كل مدة.
مثال على المهمة اليومية: كان عندي اولوية اني اقرأ قرآن كل يوم.
طبعا تركتها للظروف و "اذا فضيت" و "اذا صار الوقت مناسب عشان الخشوع" ما قرأت و لا آية.
حطيت في جدولي اليومي قراءة عدد صفحات معين. و اعتبرته مهمة يومية. ما يعدي اليوم الا اذا اتممتها. نجحت في هذه المهمة.
مثال على المهمات الأسبوعية:
زيارة الاقارب، اجتماع صحبة، قراءة من كتب، انجاز جزء من مهمة، رياضة ٣-٤ مرات في الأسبوع، مقاضي
طبيعي تتحول بعض مهماتك اليومية الى أسبوعية و العكس انت تحدد حسب الأولوية و الحاجة. مثلا: كانت القراءة في الطب مهمة يومية بالنسبة لي في سنوات الإقامة و التخصص، بعد ما حصلت على الشهادات و رتم المعلومات الجديدة في تخصصي سار ابطأ بالنسبة لي، و صرت متخصص في مجال فرعي، قررت انها تكون مهمة اسبوعية. كل أسبوع لازم اقرأ في الأبحاث الجديدة او المراجع الطبية او الإرشادات و التوصيات العالمية. طبعا سار عندي وقت فراغ مكان قراءة الطب فتحولت الى قراءة في كتب خارج الطب و سماع محاضرات.
اذا تقدر تجمّع بعض المهمات اليومية البسيطة الى أسبوعية، راح تحرر وقت اكثر لشيء مفيد. مثلا بدل ما كل يوم تشتري شيء من البقالة، يوم خبز و يوم حليب و يوم فواكه، اجمعها كلها لمهمة في يوم واحد في الأسبوع.
حوّل أمنياتك الى أهداف باستخدم الطريقة هذه: الأمنية، النتيجة، العوائق، طرق الحل.
مثال:
الأمنية: اتمنى احصل ترقية في العمل
النتيجة: أصير مدير مبيعات او تسويق
العوائق: المنصب هذا يحتاج دورة او شهادة مع خبرة
طرق الحل: ابحث عن دورة و اسجل فيها
الطريقة: الدورة تحتاج لغة انجليزية، أخذ دورة او شهادة لغة، بعدين أخذ دورة التسويق و المبيعات. خلال هذه المدة انجز عملي و ابدع فيه و سيرتي تكون حسنة. اذا اكتملت الشروط، كنت الجاهز و الأجدر بالمنصب.
كذا انت حوّلت الأمنية الى خطوات و مشيت في الطريق الصحيح لتحقيقها. البديل هو الاستمرار في التمني و استخدام شماعة او ملامة الغير.
أمنيتك طلعها من عالم الأحلام الخيالي و حوّرها بما يطابق الواقع.
مثلا:
ابغى ألاقي توأم روحي و اتزوجه/ها. غلط
يا ليت يتغير زوجي/زوجتي و يصير توأم روحي. كمان غلط.
الأمنية: أبغى زواج ناجح.
النتيجة: بيت سعيد من دون خلافات و مضاربات صالح للتربية و تحقيق الأحلام.
العوائق: نختلف و نتضارب على اتفه الاسباب.
الحل: احاول استمع لوجهة النظر و افهم قبل ما ارد. اسوي الواجبات اللي علّي اول. احسن اخلاقي و تعاملي.
اترك كل شيء تسويه يستهلك وقتك و مردوده عليك ضعيف. و هذه لها أمثلة كثير، تطبيقات التواصل الاجتماعي لأوقات طويلة، مردودها ضعيف لك و يمكن اثرها السيء يكون اكبر. جلسات الاستراحة او الاصحاب لأوقات طويلة بدون فايدة و تضييع الوقت. انا ما أقول لك لا تنبسط و لا تتمشى و اجلس في البيت اشتغل زي المكينة بس لا تضيع وقتك على الفاضي.
اترك كل شيء له خطورة عالية و مردود منخفض.
في دراسة نفسية سلوكية، حدد العلماء مستوى السعادة مع كل نشاط سواه أفراد الدراسة. و وضحت ان السعادة كانت اكبر بأفعال نشطة.
٤٤٪ مع الرياضة و ٣٠٪ مع الهواية و ١٣٪ مع الفرجة على التلفزيون. ايش سووا أفراد الدراسة في الحقيقة؟
٤٠٪ اتفرج على التلفزيون!
ليش؟ لأنه بسيط و ما عندهم خطة و فيه تكون سلبي و متلقي
في الحياة ما فيه شيء دائم
Permanent
Pervasive
Personal
اترك الكمال و جرب و افشل و عيد الى ان تنجح و تغير فكرتك او تسير ما لها مردود
Comments
Post a Comment