تربية طفلك
نجاحك في تربية طفلك راح يغير حياته و حياتك
و راح يشكل نوعية الاصدقاء و الطبقة الاجتماعية اللي راح يكون فيها لمن يكبر و بالتالي نجاحه و سعادته في الحياة و في الآخرة
هذه خلاصة كثير من الدراسات العلمية في هذا المجال.
الطفل فيه:
١- صفات و مزاج و طباع نفسية مجبول عليها
٢- يكتسب العادات من اللي حوله
٣- يحب يكتشف و يجرب و يعرف حدود جسمه و عقله و كلامه و قوته
اثرك كبير عليه في هذه النقاط الثلاث
تقدر تعلمه كيف يتحكم بمشاعره و يغير مزاجه و طباعه النفسية بشكل ممتاز بدل ما يكون مرهون بها
المفروض انك تكون قدوة حسنة له عشان يكتسب هذه العادات منك لأنه يقلد اكثر من انه يطبق الكلام اللي تقول
مخالطتك للطفل في اللعب و الكلام تعلمه حدود المقبول في الكلام و اللعب الجسدي و تفتح مجالات له
هدفك الاساسي المرسوم قدامك انه يكون مقبول اجتماعيا من اللي حوله و يكون محبوب.
لا تتركه بس كذا يسوي اللي يبغاه و يجرب لأنه ما يعرف المقبول من المؤذي
علّمه انه ما يضرب الاطفال الثانيين و علمه ان حتى اللعب الجسدي له حدود و ما يكون مؤذي
علمه ان السب عيب و غلط و مؤذي للناس و الغش في اللعب صفة مكروهة
الطفل يتعلم بسرعة و خاصة اذا خليته يتخيل الوضع معكوس. ترضى احد يسوي فيك كذا مثل ما انت سويت؟
اذا اتعلم هذه الاشياء راح يكون محبوب من الكبار و الصغار و تزيد علاقاته الاجتماعية مع الناس اللي تربي اولادها بنفس الطريقة و راح يتعلم اشياء كثير تفيده اذا كبر
اما اذا فشلت في تربيته على هذه الاشياء راح يكون محاط بناس لها نفس الطباع السيئة و الكبار منهم اما يبتسم في وجهه مجاملة و نفاق او بعدوانية بسبب تصرفاته غير المقبولة. هذه بيئة مدمرة للطفل و تخرج انسان غير سوي. او يتلطش في الحياة و يتعلمها متأخر او يفضل كذا ضايع عمره ما اتعلم.
Comments
Post a Comment